Eli Urbanová – Luna nokto

Arĝenta Lun´, ĉiela suvereno,

de stel´al stel´ flirtanta kavalir´,

vidante vin naĝanta tra l´kurteno

etendas mi la manojn pro admir´.

Promeni nur sur mola herbopluŝo

En bosk´ bertula plena je parfum´,

sen vestkiras´ ekdanci sub rosduŝo

kovrite nur per via brila lum´!

Kaŝludos mi kun vi, arĝenta Luno,

dum virtuoze trilos najtingal´,

vin serĉos, serĉos – fine en laguno

atingos min la svene vibra pal´.